2006

MANNRÉTTINDASTOFNUN

Almennt yfirlit og stjórn
Mannréttindastofnun Háskóla Íslands er sjálfseignarstofnun, stofnuð af Háskóla Íslands, Lögmannafélagi Íslands og Dómarafélagi Íslands, 14. apríl 1994.  Aðsetur stofnunarinnar er í Lögbergi við Suðurgötu.

Stjórn Lagastofnunar var þannig skipuð árið 2006:  Björg Thorarensen prófessor við lagadeild HÍ, formaður, Hjördís Hákonardóttir dómstjóri við héraðsdóm Suðurlands, Róbert R. Spanó dósent við lagadeild HÍ og Hrefna Friðriksdóttir hdl. meðstjórnendur.   Varamenn í stjórn voru Hilmar Magnússon hrl. og Pétur Leifsson dósent við lagadeild HA.  Framkvæmdastjóri var María Thejll hdl.

Útgáfa
Dómareifanir Mannréttindadómsóls Evrópu
Mannréttindastofnun Háskóla Íslands hóf útgáfu tímarits með dómareifunum Mannréttindadómstóls Evrópu á íslensku árið 2005 en tímaritið mun koma út tvisvar á ári. Dómsmálaráðuneytið styrkir útgáfuna en sérstök ritstjórn hefur umsjón með henni. Ritstjóri tímaritsins er Björg Thorarensen prófessor við lagadeild Háskóla Íslands en í ritnefnd sitja dr. Oddný Mjöll Arnardóttir prófessor við lagadeild Háskólans í Reykjavík og Skúli Magnússon héraðsdómari og dósent við lagadeild Háskóla Íslands.

Í tímaritinu eru reifaðir valdir dómar sem taldir eru hafa sérstakt gildi fyrir túlkun ákvæða sáttmálans. Þá eru teknir með dómar sem hafa sérstaka þýðingu fyrir íslenskan rétt, einkum í málum gegn hinum Norðurlöndunum þar sem oft er til umfjöllunar löggjöf eða ákvarðanir sem eiga hliðstæðu í íslenskri réttarframkvæmd. Loks eru birtar í heild sinni í íslenskri þýðingu ákvarðanir og dómar í kærumálum gegn íslenska ríkinu sem fram til þessa hafa aðeins verið birtir á heimasíðu dómsmálaráðuneytisins.

Annað hefti ársins 2005 en þar eru reifaðir dómar uppkveðnir á tímabilinu júlí til desember 2005, kom út í mars 2006. Fyrsta hefti ársins 2006, með dómum frá janúar til júní 2006, kom út í október 2006.

Málstofa
Mannréttindastofnun efndi til málstofu 25. september 2006 undir yfirskriftinni: Nýr alþjóðasamningur um réttindi fatlaðra. Réttarbætur eða fögur fyrirheit. Erindi fluttu Óskar Páll Óskarsson lögfræðingur í félagsmálaráðuneyti, Brynhildur G. Flóvenz lektor við lagadeild Háskóla Íslands og Helgi Hjörvar alþingismaður. Björg Thorarensen prófessor við lagadeild Háskóla Íslands var fundarstjóri.

Styrkveiting
Auglýstur var styrkur að fjárhæð kr. 300.000.- af hálfu Mannréttindastofnunar til framhaldsnáms í mannréttindum á árinu 2005. Tvær umsóknir bárust og var Kjartani Bjarna Björgvinssyni lögfræðingi sem stundaði nám við London School of Economics veittur styrkurinn.

Sjá má nánari upplýsingar á veffangi Mannréttindastofnunar: www.mhi.hi.is.

Þú ert að nota: brimir.rhi.hi.is